وقف قبل لا تروح واسمع ثواني

وقف قبل لا تروح واسمع ثواني..!
مانيب من يبكي على شانك أقفيت
***

لا تحسب اني بغيابك أعاني
او بنثر دموعي إليا اصبحت وامسيت
***

بالعكس مثلك واجد بهالزماني
وياما بهالدنيا مرض وتشافيت
***

كنت احسبك لا ضاق فيا المكاني
بيت لشخص تائه مالقى بيت
***

مثلت لي دور الخوي الأناني
وانا على النيه بضهرك تعزويت
***

واللي هقيته فيك عكسه لفاني
ما اذكر أنا في حقك بيوم زليت
***

لا تحسب الخافق بهجرك يعاني
مالك غلى عندي مادامك تغليت
***

والله فلا اتبع خطوة اللي جفاني
بالعكس عزة خاطري رحت وإن جيت
***

والله لا أنسى كل شخص نساني
ولشوفته والله فلا أقول ياليت
***


تعبت دور لي رفيق بزماني
بس هالزمن ماجى على ماتمنيت


للشآعر: بندر الخمشي